तेजश्री प्रधान-सुबोध भावे पहिल्यांदाच एकत्र झळकणार; ‘हॅशटॅग तदेव लग्नम’चा टीझर प्रेक्षकांच्या भेटीला

तेजश्री प्रधान-सुबोध भावे पहिल्यांदाच एकत्र झळकणार; ‘हॅशटॅग तदेव लग्नम’चा टीझर प्रेक्षकांच्या भेटीला

मराठी चित्रपटसृष्टीतील लोकप्रिय कलाकार तेजश्री प्रधान आणि सुबोध भावे पहिल्यांदाच एकत्र रुपेरी पडद्यावर झळकणार आहेत. लवकरच शुभम फिल्म प्रोडक्शनच्या ‘हॅशटॅग तदेव लग्नम्’ चित्रपट प्रेक्षकांच्या भेटीला येत आहे आणि त्याचा टीझर नुकताच प्रदर्शित झाला आहे. टीझरमध्ये लग्न आणि त्यावर आजच्या आधुनिक पिढीचा वेगळा दृष्टीकोन कसा आहे हे दाखवले आहे.

लग्नाआधीची पहिली भेट: टीझरमध्ये दिसणारी केमेस्ट्री

टीझरवरून सुबोध भावे आणि तेजश्री प्रधान हे या चित्रपटातील मुख्य भूमिकांत असल्याचे स्पष्ट झाले आहे. दोन मध्यमवर्गीय घरांतील तरुण आणि तरुणीच्या लग्नाची लगबग सुरू असल्याचे टीझरमध्ये दाखवले आहे. कुटुंबीयांच्या सांगण्यावरून दोघेही एकमेकांना पहिल्यांदाच भेटतात. भेटताना दोघांच्या मनात अनेक प्रश्न निर्माण होतात आणि भेटीनंतर दोघांच्याही मनात एकमेकांच्या वयाचा प्रश्न निर्माण होतो. सुबोध भावे आणि तेजश्री प्रधानच्या मनातील हे संवाद फारच मजेशीर आहेत आणि टीझरमध्ये दोघांची केमेस्ट्री खुलून दिसत आहे.

सोशल मीडियावर टीझर प्रकाशित

सोशल मीडियावर पोस्ट केलेल्या टीझरला, “लग्नाआधीची पहिली भेट, थोडीशी लेट, पण झालीय मात्र एकदम थेट.” अशी कॅप्शन लिहिली आहे. या चित्रपटात सुबोध भावे, तेजश्री प्रधान यांच्यासह प्रदीप वेलणकर, मानसी मागिकर, संजय खापरे, शर्मिष्ठा राऊत यांच्याही महत्वपूर्ण भूमिका आहेत.

दिग्दर्शकांचे विधान

आनंद दिलीप गोखले यांनी या चित्रपटाचे लेखन व दिग्दर्शन केले आहे; तर शेखर विठ्ठल मते निर्माते आहेत. दिग्दर्शक आनंद दिलीप गोखले यांनी चित्रपटाविषयी म्हटलं, “हा चित्रपट आजच्या काळातील लग्न आणि नातेसंबंधांच्या बदलत्या संकल्पनेवर आधारित आहे. आत्ताच्या पिढीच्या विचारसरणीत मोठा बदल झाला असून हाच विचार चित्रपटात मांडला आहे.” तसेच प्रेक्षकांना हा चित्रपट नक्कीच आवडेल अशी आशा आनंद दिलीप गोखले यांनी व्यक्त केली आहे.

निर्मात्यांचे विधान

तर चित्रपटाचे निर्माते यावर म्हणतात, ” हा चित्रपट आजच्या काळाचा असून तो संपूर्ण कुटुंबाने एकत्र बसून पाहावा असा आहे. काळानुसार तरुणांची विचारसरणी बदलत चालली असून त्यामागे त्यांची काही ठोस कारणे आहेत. तरुणाईचे हेच विचार यात मांडण्यात आले आहे. आपल्यापैकी अनेकांना हा चित्रपट आपल्या जवळचा वाटेल.” २० डिसेंबरपासून ‘हॅशटॅग तदेव लग्नम’ चित्रपट आपल्या जवळच्या चित्रपटगृहात पाहता येणार आहे.