पिंपरी-चिंचवडमधील भाजपला धक्का: १३ माजी नगरसेवकांचे पक्षांतर, अंतर्गत नाराजी उफाळली

पिंपरी-चिंचवडमधील भाजपला धक्का: १३ माजी नगरसेवकांचे पक्षांतर, अंतर्गत नाराजी उफाळली

पिंपरी-चिंचवडमधील भाजप पक्षासाठी आगामी विधानसभा निवडणुकीच्या तोंडावर मोठा धक्का बसला आहे. आतापर्यंत १३ माजी नगरसेवकांनी भाजपला सोडचिठ्ठी दिली असून या घडामोडीमुळे पक्षाच्या अंतर्गत संघर्षाची झलक समोर येत आहे. विशेष म्हणजे, या नगरसेवकांपैकी आठजण भोसरी मतदारसंघातून आहेत, ज्यामुळे या भागातील भाजपच्या ताकदीवर प्रश्नचिन्ह उभे राहिले आहे.

२०१७ मध्ये उपमुख्यमंत्री अजित पवार यांच्या नेतृत्वाखाली राष्ट्रवादी काँग्रेसच्या १५ वर्षांच्या सत्तेचा भाजपने पराभव केला होता. दिवंगत आमदार लक्ष्मण जगताप आणि आमदार महेश लांडगे यांसारख्या नेत्यांनी त्यावेळी राष्ट्रवादीचा त्याग करून भाजपमध्ये प्रवेश केला होता. त्यावेळी भाजपने महापालिकेत सत्ता स्थापन करून शहराचा राजकीय चेहरामोहरा बदलला.

नाराजीचे कारण काय?

महापालिकेत भाजपने सत्ता मिळवल्यानंतर काही नेत्यांना पदे मिळाली, परंतु बऱ्याच जणांना केवळ आश्वासने मिळाली. महापालिकेतील पदवाटपातही नाराजीची बीजे होती. काही माजी नगरसेवकांनी आरोप केला की त्यांना महत्त्वाची पदे दिली गेली नाहीत आणि निर्णय प्रक्रियेत सहभागही मिळाला नाही. त्यामुळे अनेक माजी नगरसेवकांनी पक्ष सोडला, ज्यामध्ये माया बारणे, बाबा बारणे, आणि रवी लांडगे यांचा समावेश आहे.

शिवाय, रवी लांडगे आणि एकनाथ पवार यांनी शिवसेना (ठाकरे) पक्षात प्रवेश केला तर उर्वरित नगरसेवकांनी राष्ट्रवादी (शरद पवार गट) पक्षात प्रवेश केला आहे.