पोलीस असल्याचा बहाणा करून ज्येष्ठ नागरिकांची ७० लाखांची फसवणूक; कारवाईची भीती दाखवून फसवणुकीचे प्रमाण वाढले

पुण्यात दोन वेगवेगळ्या घटनांमध्ये सायबर चोरट्यांची फसवणूक

पुणे, 23 ऑक्टोबर 2024 – सायबर चोरट्यांनी पोलीस असल्याचे भासवून दोन वेगवेगळ्या घटनांमध्ये पुण्यातील ज्येष्ठ नागरिकांची ७० लाख रुपयांची फसवणूक केली आहे. यामध्ये चतु:शृंगी पोलीस ठाण्यातील एका तक्रारीनुसार, पाषाण परिसरात राहणाऱ्या एका ज्येष्ठ नागरिकाला सप्टेंबर महिन्यात समाज माध्यमांद्वारे संदेश पाठवून चोरट्यांनी पोलीस असल्याचे सांगितले आणि त्यांची आर्थिक फसवणूक केली.

चोरट्यांनी बनावट पोलीस ओळखपत्र पाठवून, तक्रारदारांच्या बँक खात्यातून काळ्या पैशांचे व्यवहार होत असल्याचा खोटा आरोप केला. गुन्हा दाखल होऊ नये म्हणून तातडीने पैसे जमा करावे लागतील, अशी धमकी देऊन चोरट्यांनी त्यांच्या खात्यातून ४५ लाख रुपये ऑनलाइन पद्धतीने हस्तगत केले.

दुसऱ्या घटनेत, टिळक रस्त्यावरील ८४ वर्षीय नागरिकाची चोरट्यांनी फसवणूक केली. चोरट्यांनी त्यांच्याशी मोबाईलवर संपर्क साधून त्यांची बँक माहिती मिळवली आणि २५ लाख ४० हजार रुपये चोरले. या फसवणुकीतील रक्कम चोरट्यांनी विविध बँक खात्यांमध्ये हस्तांतरित केली आहे.

गुन्हे शाखेचे पोलीस निरीक्षक मोरे याप्रकरणाचा तपास करत आहेत. पुण्यात सायबर गुन्ह्यांच्या घटनांमध्ये, विशेषतः कारवाईची भीती दाखवून होणाऱ्या फसवणुकीत, मोठी वाढ झाल्याचे दिसून येत आहे.