अजित पवारांचे विश्वासू आमदार अण्णा बनसोडेंना महायुतीमधून विरोध; १८ माजी नगरसेवकांचा ठराव

पिंपरी विधानसभेतील राजकारणात नवा ट्विस्ट

अजित पवारांचे विश्वासू आमदार अण्णा बनसोडेंना महायुतीमधून विरोध; १८ माजी नगरसेवकांचा ठराव

पिंपरी: पिंपरी विधानसभेचे विद्यमान आमदार अण्णा बनसोडे, जे अजित पवारांचे विश्वासू मानले जातात, त्यांना महायुतीतील १८ माजी नगरसेवकांनी विरोध केला आहे. अजित पवारांच्या बंडाच्या वेळी शेवटपर्यंत साथ देणारे आमदार अण्णा बनसोडे यांची उमेदवारी निश्चित मानली जात असतानाच, त्यांच्या कार्यपद्धतीबाबत महायुतीतील नगरसेवकांमध्ये नाराजी आहे.

महायुतीतील भाजप, शिंदे गट, आरपीआय, आणि अजित पवार गटाच्या इच्छुक माजी नगरसेवकांनी पिंपरीतील एका हॉटेलमध्ये बैठक घेऊन त्यांच्या उमेदवारीला विरोध केला. या बैठकीत चारही घटक पक्षांच्या माजी नगरसेवकांनी एकत्र येऊन अण्णा बनसोडे हे निष्क्रिय आमदार असल्याचा आरोप केला आणि त्यांना पुन्हा उमेदवारी दिल्यास त्यांचा प्रचार न करण्याचा निर्णय घेतला.

महायुतीच्या फॉर्म्युल्यानुसार विद्यमान आमदार असलेल्या पक्षाला तीच जागा दिली जाणार आहे. यामुळे अजित पवार गटाचे आमदार अण्णा बनसोडे यांच्या नावाची चर्चा होती. मात्र, या १८ माजी नगरसेवकांनी बनसोडे यांच्या विरोधात ठराव पारित करत त्यांना उमेदवारी न देण्याची मागणी केली आहे. यामध्ये भाजपचे राजेश पिल्ले, शिंदे गटाचे जितेंद्र ननावरे, आरपीआयच्या चंद्रकांता सोनकांबळे, आणि अजित पवार गटाचे काळूराम पवार हे प्रमुख इच्छुक आहेत.

अण्णा बनसोडे यांना उमेदवारी मिळाल्यास, आम्ही त्यांचा प्रचार करणार नाही, अशी भूमिका महायुतीतील नगरसेवकांनी घेतली आहे. महायुतीतून उमेदवार निवडण्याच्या प्रक्रियेत हा मोठा विरोध लक्षात घेण्याजोगा आहे. अजित पवारांनी उपमुख्यमंत्री पदाची शपथ घेतली तेव्हा बनसोडे त्यांच्या सोबत होते, त्यामुळे आता पवार त्यांना पाठिंबा देतील का, याकडे सर्वांचे लक्ष लागले आहे.

महायुतीत असलेला हा अंतर्गत विरोध आणि बनसोडेंच्या उमेदवारीवर झालेला विरोध, पिंपरी विधानसभेतील राजकीय परिस्थिती कशी बदलते, हे येत्या काही दिवसांत स्पष्ट होईल.