पिंपरी: अश्विनी जगताप यांनी घेतली माघार, जगताप कुटुंबातील गृहकलह संपुष्टात

पिंपरी: जगताप कुटुंबातील गृहकलह संपुष्टात, अश्विनी जगताप यांनी घेतली महत्त्वपूर्ण भूमिका

पिंपरी चिंचवड,  चिंचवड विधानसभा मतदारसंघातील जगताप कुटुंबातील दीर-भावजयमधील राजकीय कलह अखेर संपला आहे. आमदार अश्विनी जगताप यांनी उमेदवारीच्या स्पर्धेतून माघार घेतली असून, भाजप प्रदेशाध्यक्ष चंद्रशेखर बावनकुळे यांच्याकडे शंकर जगताप यांच्या उमेदवारीची शिफारस केली आहे. यामुळे भाजपमधील अंतर्गत वाद शमला असून, शंकर जगताप यांची चिंचवड मतदारसंघातून उमेदवारी जवळपास निश्चित मानली जात आहे.

चिंचवड मतदारसंघात दिवंगत आमदार लक्ष्मण जगताप यांचे वर्चस्व कायम राहिले होते. त्यांच्या निधनानंतर झालेल्या पोटनिवडणुकीत पत्नी अश्विनी जगताप आणि बंधू शंकर जगताप यांनी उमेदवारीसाठी दावेदारी केली होती. मात्र, पक्षाने अश्विनी जगताप यांना उमेदवारी दिली, आणि त्या मोठ्या मतांनी विजयी झाल्या होत्या.

यंदाच्या विधानसभा निवडणुकीतही दीर-भावजयीमध्ये उमेदवारीसाठी रस्सीखेच सुरू होती. या पार्श्वभूमीवर, भाजपमधील १५ माजी नगरसेवकांच्या गटाने जगताप कुटुंबातील उमेदवारीला विरोध दर्शवला होता. मात्र, आता अश्विनी जगताप यांनी शंकर जगताप यांना उमेदवारीसाठी पाठिंबा देत माघार घेतली आहे, ज्यामुळे भाजपमधील गटबाजी थांबण्याची शक्यता आहे.

आमदार अश्विनी जगताप यांच्या या निर्णयामुळे चिंचवड मतदारसंघातील राजकीय समीकरणे बदलली असून, भाजपला निवडणुकीत एकत्रितपणे पुढे जाण्याचा मार्ग मिळाला आहे.