चिंचवड विधानसभा: जगताप कुटुंबाच्या उमेदवारीला भाजपमधून विरोध, माजी नगरसेवकांचा ठराव

विधानसभा निवडणुकीत चिंचवड मतदारसंघात भाजपमधील अंतर्गत संघर्ष उफाळला आहे. माजी नगरसेवकांनी जगताप कुटुंबाच्या उमेदवारीला विरोध दर्शवत ठराव केला आहे.

चिंचवड विधानसभा: जगताप कुटुंबाला भाजपमधून विरोध; माजी नगरसेवकांचा ठराव

पिंपरी-चिंचवड, १५ ऑक्टोबर २०२४: आगामी विधानसभा निवडणुकांसाठी चिंचवड विधानसभा मतदारसंघातून भाजपमधील अंतर्गत विरोध उफाळला आहे. भाजपचे शहराध्यक्ष शंकर जगताप आणि आमदार अश्विनी जगताप यांच्या उमेदवारीला पक्षातील काही माजी नगरसेवकांनी कडाडून विरोध केला आहे. माजी नगरसेवक शत्रुघ्न काटे आणि चंद्रकांत नखाते यांनी एकत्र येऊन माजी नगरसेवकांची बैठक आयोजित केली, ज्यात जगताप कुटुंबाच्या उमेदवारीला विरोध दर्शवण्यात आला.

या बैठकीत ठराव करण्यात आला की, जगताप कुटुंबातील व्यक्तींना सोडून इतर कोणालाही उमेदवारी दिली जावी, अन्यथा आम्ही पक्षाचे काम करणार नाही. या विरोधाने भाजपमधील अंतर्गत ताणतणाव अधिक उघड झाला आहे. माजी नगरसेवक चंद्रकांत नखाते, शत्रुघ्न काटे, संदीप कस्पटे, कैलास बारणे, बाळासाहेब ओव्हाळ, माधुरी कुलकर्णी यांसह अन्य भाजप नेते आणि कार्यकर्ते या बैठकीला उपस्थित होते.

जगताप कुटुंबाच्या उमेदवारीवर अजूनही अंतिम निर्णय झालेला नसला तरी, या विरोधामुळे भाजपच्या अंतर्गत गटबाजी आणि उमेदवारीच्या चुरशीला नव्याने रंग भरला आहे.