मराठीचा डंका अधिक जोमाने वाजणार!

मुख्यमंत्री एकनाथ शिंदे यांनी रविवारी व्यक्त केले की, मराठी भाषेला अभिजात भाषेचा दर्जा मिळाल्याने तिचा डंका आता अधिक जोमाने सर्वत्र वाजणार आहे. ते मुंबईच्या चर्नी रोड येथील जवाहर बालभवन परिसरात उभारण्यात येणाऱ्या ‘मराठी भाषा भवन’च्या भूमिपूजन समारंभात बोलत होते. या ‘मराठी भाषा भवन’च्या माध्यमातून मराठी भाषेच्या संवर्धनासाठी अधिक बळ मिळणार असल्याचे त्यांनी सांगितले.

मुख्यमंत्री शिंदे यांच्या हस्ते दूरदृश्य प्रणालीद्वारे या भवनाचे भूमिपूजन करण्यात आले. या समारंभास विधानसभा अध्यक्ष अॅड. राहुल नार्वेकर, शालेय शिक्षण आणि मराठी भाषा मंत्री दीपक केसरकर, मुंबई उपनगर जिल्ह्याचे पालकमंत्री मंगलप्रभात लोढा, विधान परिषद उपसभापती डॉ. नीलम गोऱ्हे, तसेच इतर मान्यवर उपस्थित होते.

शिंदे यांनी मराठी भाषेच्या विकासासाठी साहित्यिक आणि इतर क्षेत्रातून आलेल्या सूचनांचा आदर केला जाईल असेही सांगितले. मराठी भाषा दोन हजार वर्षांपेक्षा जुनी असल्याचे नमूद करून, या भाषेच्या संवर्धनासाठी अधिक संशोधन व प्रसार करण्यात येणार असल्याचे त्यांनी स्पष्ट केले.

मराठी भाषेच्या गौरवात संत, ज्ञानपीठकार आणि साहित्यिकांनी मोलाची भर घातली आहे. त्यांच्या योगदानामुळेच मराठी भाषा अधिक समृद्ध झाली आहे, असेही शिंदे यांनी या प्रसंगी सांगितले.