‘सिंघम अगेन’चा जबरदस्त ५ मिनिटांचा ट्रेलर रिलीज

‘सिंघम अगेन’चा जबरदस्त ट्रेलर पाहिलात का? ५ मिनिटांचा ट्रेलर कापण्यासाठी रोहित शेट्टीने घेतले तब्बल ‘एवढे’ दिवस

रोहित शेट्टीचा बहुप्रतिक्षित चित्रपट 'सिंघम अगेन' प्रेक्षकांच्या भेटीला येण्यासाठी सज्ज झाला आहे. अजय देवगण पुन्हा एकदा बाजीराव सिंघमच्या दमदार भूमिकेत झळकणार आहे. सिनेमाच्या ट्रेलरने सध्या सोशल मीडियावर धुमाकूळ घातला असून, याला तीन तासांत २ मिलियनहून अधिक व्ह्यूज मिळाले आहेत. ट्रेलर अ‍ॅक्शन, ड्रामा आणि भावनांनी भरलेला आहे, ज्यामुळे प्रेक्षकांच्या चित्रपटाबद्दलच्या अपेक्षा उंचावल्या आहेत.

हा जवळपास ५ मिनिटांचा ट्रेलर हिंदी सिनेमातील सर्वात लांब ट्रेलर्सपैकी एक आहे. यामध्ये प्रत्येक पात्राचं भव्य आणि आकर्षक सादरीकरण करण्यात आलं आहे. ट्रेलरमध्ये रामायणाचा संदर्भ घेतला असून, खलनायक सिनेमात करीना कपूरचं अपहरण करतो, जसं की रामायणात रावणाने सीतेचं अपहरण केलं होतं. बाजीराव सिंघम (अजय देवगण) श्रीलंकेला जाऊन तिला वाचवण्याचं मिशन हाती घेतो, ज्यात दीपिका पदुकोण, टायगर श्रॉफ, रणवीर सिंह आणि अक्षय कुमार त्याला मदत करतात.

यादरम्यान हेलिकॉप्टरवरून उडणाऱ्या गाड्या, मोठमोठे स्टंट्स आणि जबरदस्त अ‍ॅक्शन पाहायला मिळते, ज्यामुळे रोहित शेट्टीच्या अ‍ॅक्शन-फिल्म शैलीचा परिपूर्ण अनुभव प्रेक्षकांना मिळतो.

ट्रेलर तयार करण्यासाठी तब्बल ४० दिवस लागले आहेत, असे एका सूत्राने सांगितले. ट्रेलरची एडिटिंग परफेक्ट करण्यासाठी रोहित शेट्टी आणि त्याच्या टीमने खूप मेहनत घेतली. एवढा वेळ घेऊन ट्रेलर तयार करण्याची ही त्यांची पहिलीच वेळ असल्याचे सूत्राने म्हटले आहे.

'सिंघम अगेन' यंदाच्या दिवाळीत, १ नोव्हेंबरला, प्रेक्षकांच्या भेटीला येणार आहे.