अजित पवार शिरूरमधून निवडणुकीच्या मैदानात?

पुणे, 7 ऑक्टोबर 2024: उपमुख्यमंत्री अजित पवार यांच्याकडून बारामतीमधून निवडणूक न लढविण्याचे संकेत मिळाल्यानंतर, आता ते शिरूर मतदारसंघातून निवडणूक लढवण्याची शक्यता आहे. शिरूर हा राष्ट्रवादी काँग्रेसचा बालेकिल्ला मानला जातो आणि येथे अजित पवार यांच्याविरुद्ध राष्ट्रवादी काँग्रेस (शरद पवार गट) चे विद्यमान आमदार अशोक पवार अशी थेट लढत होण्याची शक्यता आहे.

गुरुवारी झालेल्या एका मेळाव्यात अजित पवार यांनी बारामती विधानसभा मतदारसंघातून निवडणूक न लढविण्याचे संकेत दिले होते. यानंतर ते कोणत्या मतदारसंघातून निवडणूक लढवणार याबद्दल कार्यकर्त्यांमध्ये उत्सुकता निर्माण झाली आहे. पक्षातील सूत्रांच्या मते, शिरूर मतदारसंघातून निवडणुकीच्या तयारीची चाचपणी सुरू आहे.

शिरूरमधील विद्यमान खासदार डॉ. अमोल कोल्हे आणि आमदार अशोक पवार यांनी राष्ट्रवादी काँग्रेसच्या फुटीनंतर शरद पवार यांच्याशी निष्ठा कायम ठेवली आहे. काही महिन्यांपूर्वी झालेल्या शिरूरमधील मेळाव्यात अजित पवार यांनी अशोक पवार यांना थेट आव्हान दिले होते आणि त्यांच्यावर टीका केली होती. जर अजित पवार शिरूरमधून निवडणुकीच्या मैदानात उतरले तर अशोक पवार यांच्यासमोर मोठे आव्हान उभे राहील.

पक्षाच्या स्थानिक नेतृत्वाची प्रतिक्रिया:
अजित पवार हे फक्त बारामती किंवा शिरूरमधूनच नव्हे, तर राज्यातील कोणत्याही मतदारसंघातून सहज विजयी होऊ शकतात, असे मत पुणे जिल्ह्याचे राष्ट्रवादी काँग्रेसचे अध्यक्ष प्रदीप गारटकर यांनी व्यक्त केले आहे.